کوئٹہ میں دھماکہ،2 پولیس اہلکاروں سمیت 5 افراد جاں بحق اور30 زخمی

0

کوئٹہ(اے ون نیوز) باچاخان چوک کے قریب بم دھماکے میں 2 پولیس اہلکاروں سمیت 5 افراد جاں بحق اور 30 زخمی ہوگئے۔ کوئٹہ کے علاقے باچاخان چوک کے قریب دھماکا ہوا جس کے نتیجے میں 2 پولیس اہلکاروں سمیت 5 افراد جاں بحق اور 30 زخمی ہوگئے جب کہ دھماکے میں ایڈیشنل ایس ایچ او سٹی تھانہ شفاعت علی بھی شدید زخمی ہوئے ہیں، دیگر زخمیوں میں خواتین اور بچے بھی شامل ہیں۔

ایم ایس سول اسپتال سلیم ابڑو کا کہنا ہے کہ دھماکے میں زخمیوں کی تعداد 30 ہو گئی ہے جب کہ 6 زخمیوں کی حالت تشویشناک ہے۔ پولیس حکام کے مطابق دھماکا لیاقت بازار میں سٹی تھانے کے سامنے ہوا، دھماکا اس قدر شدید تھا کہ اس کی آواز دور دور تک سنائی دی اور قریبی عمارتوں کے شیشے ٹوٹ گئے۔

صدر مملکت ڈاکٹر عارف علوی اور وزیر اعظم عمران خان نے کوئٹہ دھماکے کی شدید الفاظ میں مذمت کرتے ہوئے قیمتی جانوں کے ضیاع پر افسوس اور غمزدہ خاندانوں سے اظہار ہمدردی کی ہے، انہوں نے زخمیوں کو بہترین طبی امداد فراہم کرنے کی ہدایت اوران کی جلد صحتیابی کے لئے دعا بھی کی۔

دوسری جانب وزیراعلیٰ بلوچستان جام کمال خان نے بم دھماکے کی مذمت کرتے ہوئے رپورٹ طلب کرلی، وزیراعلیٰ نے زخمیوں کو بہترین طبی سہولیات فراہم کی ہدایت بھی کی ہے۔

LEAVE A REPLY

Please enter your comment!
Please enter your name here