گورنر پنجاب بلیغ الرحمان نے وزیراعلیٰ پرویز الہٰی کو ڈی نوٹیفائی کردیا، پرویز الہٰی نئے قائد ایوان کے چناؤ تک عہدے پر کام کریں گے۔
گورنر پنجاب بلیغ الرحمان نےوزیر اعلیٰ پنجاب چوہدری پرویز الہٰی کو ڈی نوٹیفائی کیا جس کا نوٹیفکیشن جاری کردیا گیا ہے، نوٹیفکیشن میں کہا گیا ہے کہ یقین ہے وزیراعلیٰ کو اراکین اسمبلی کی اکثریت کا اعتماد حاصل نہیں، اس نوٹیفکیشن کےبعد پنجاب کابینہ ختم ہوگئی ہے۔
نوٹیفکیشن کے مطابق پرویزالہیٰ نئے قائد ایوان کے انتخاب تک عہدے پر کام جاری رکھیں گے۔
گورنر پنجاب کی جانب سے انتظامیہ اور پولیس کو پنجاب کابینہ سے ہدایات لینے سے بھی روک دیا گیا ہے۔
علاوہ ازیں چیف سیکرٹری پنجاب عبداللہ سنبل نے گورنر پنجاب کے احکامات پر عملدرآمد شروع کردیا ہے جس کے تحت چوہدری پرویز الہیٰ کو ڈی نوٹیفائی کرنے کا نوٹیفکیشن جاری کرتے ہوئے انہیں بطور وزیر اعلیٰ اور پنجاب کابینہ کو فارغ کردیا گیا ہے۔
