لاہور(اے ون نیوز)لاہور میں چالان جمع نہ کروانے والی گاڑیوں کے خلاف کریک ڈاؤن کا آغاز کردیا گیا۔
چیف ٹریفک آفیسر (سی ٹی او) لاہور اطہر وحید کے مطابق چالان جمع نہ کرانے پر ایڈیشنل سیشن جج سمیت متعدد سرکاری گاڑیاں پکڑی گئیں اور تمام گاڑیوں کو ای چالان جمع نہ کرنے پر روکا گیا۔
اطہر وحید نے بتایا کہ ایڈیشنل سیشن جج کی گاڑی کے9 چالان تھے، ان 9 چالان کا 4300 جرمانہ جمع کروانے کے بعد گاڑی کو چھوڑا گیا جب کہ محکمہ داخلہ کے سیکشن آفیسر کے ذمہ 7 چالان تھے۔
اس کے علاوہ سرکاری بینک کی گاڑی کو 10 اورلیسکو کی گاڑی کو 14 چالان پر پکڑا گیا جب کہ اوور سیز کے ڈائریکٹر اور سائبر کرائم کی گاڑیوں کو بھی پکڑ لیا گیا۔
سی ٹی او کا کہنا تھا کہ پکڑی جانے والی تمام گاڑیوں کو چالان کی ادائیگیوں کے بعد چھوڑا گیا۔
