راولپنڈی(اے ون نیوز) پولیس نے اڈیالہ جیل کے باہر جاری دھرنا ختم کروا کر پاکستان تحریک انصاف (پی ٹی آئی) کے بانی و سابق وزیراعظم عمران خان کی تینوں بہنوں کو حراست میں لے لیا۔
پولیس نے آپریشن کے دوران بانی پی ٹی آئی کی بہنوں سمیت متعدد کارکنان کو بھی حراست میں لے لیا، حراست میں لینے کے بعد پولیس نے بانی پی ٹی آئی کی بہنوں اور کارکنان کو پولیس موبائل میں منتقل کر دیا۔
بانی پی ٹی آئی کی بہنوں کی جانب سے ملاقات نہ کروائے جانے پر گزشتہ روز دوپہر 2 بجے سے اڈیالہ جیل کے قریب دھرنا جاری تھا، گرفتاری کے بعد اڈیالہ جیل کے قریب گورکھپور ناکے پر عمران خان کی ہمشیرہ نورین نیازی کی طبیعت خراب ہوگئی۔
گرفتاری سے قبل گفتگو کرتے ہوئے علیمہ خانم کا کہنا تھا کہ لیڈیز پولیس نورین نیازی کو گھسیٹ رہی تھیں، یاد رکھنا آج تک ہم شرافت میں بیٹھے رہے ہیں، میں سب کو بتا رہی ہوں کہ شرافت میں ہم نے ان کا ہر اصول فالو کیا ہے، آج میری بہنوں کے ساتھ جو سلوک کیا گیا، عورتیں ان کو سڑک پر گھسیٹ رہی تھیں، ہم نے جا کر ان کو بچایا۔
