اسلام آباد(اے ون نیوز) پی ٹی آئی رہنما بابر اعوان نے انسداد دہشتگردی کی عدالت میں دلائل دیتے ہوئے کہا کہ ایک غیر ملکی ایجنسی کسی پیشی پر عمران خان کو قتل کرنا چاہتی ہے۔اطلاعات ہیں کہ عمران خان کو اسلام اباد کچہری بلوا کر قتل کیا جائےگا۔
تفصیلات کے مطابق انسداد دہشتگردی کی عدالت میں دلائل دیتے ہوئے بابر عوان نے کہا کہ میری پریس کانفرنس پر کچھ لوگوں نے مذاق اڑایا، عمران خان نے بھی دو بار دہرایا کہ ان پر حملہ ہوگا، وزیرآباد میں عمران خان پر حملہ ہوا، حکومت نے دو مؤقف اختیارکیے کہ عمران خان پر کوئی حملہ نہیں ہوا، دوسرا مؤقف تھا کہ عمران خان پر ایک مذہبی جنونی نے حملہ کیا۔
انہوں نے کہا کہ ہمارے پاس تازہ اطلاعات اور ٹھوس شواہد ہیں کہ دوبارہ عمران خان کی جان لینے کی کوشش کی جارہی ہے، ان پر ایک اور قاتلانہ حملے کی تیار ہورہی ہے، عمران خان کو سکیورٹی کے اعتبار سے تنہا کردیا گیا ہے۔
بابر اعوان نے کہا کہ جوڈیشل کمپلیکس کے اندر سکیورٹی کے اہلکاروں کو کس نے ہٹایا، غیر ملکی ایجنسی عمران خان کی جان لینا چاہتی ہے، اطلاعات ہیں کہ عمران خان کوگھیر کر کچہری بلوا کر قتل کیا جائےگا۔عمران خان کو بلا کر بم سے اُڑانے کا منصوبہ بنایا جارہاہے۔
پی ٹی آئی رہنما نے مزید کہا کہ احمد نیازی عمران خان کی سکیورٹی کے انچارج ہیں، عمران خان کو پرسنل سکیورٹی سے محروم کرنےکیلئے سکیورٹی اسٹاف کے خلاف مقدمے کیے جارہے ہیں، عمران خان پر اصرار کیا جا رہا ہے کہ وہ عدالت حاضر ہوں ، یہ تمام پرچے اسلام آباد میں کیوں ہو رہے ہیں؟
ان کا کہنا ہے کہ اسلام آباد کچہری میں اندھے قتل ہوئے اور کچہری محفوظ نہیں ہے، ایک غیر ملکی ایجنسی کسی پیشی پر عمران خان کو قتل کرنا چاہتی ہے۔
عمران خان پر حملہ کرنے والے کو ویڈیو لنک سے پیشی کی اجازت مل سکتی ہے تو عمران خان کوکیوں نہیں؟
انہوں نے کہا ہے کہ میں سیاسی بیان نہیں دے رہا ،مجبور ہو کر لوگوں کو آگاہ کررہاہوں،شہباز شریف اور حکومت لکھ کر دےکہ عمران خان کو کچھ ہوگیا تو ذمےدار وہ ہوں گے۔
