آئی سی سی ویمنز ورلڈکپ: بھارت نے پاکستان کو 88 رنز سے شکست دے دی

کولمبو(اے ون نیوز)آئی سی سی ویمنز ورلڈکپ کےگروپ میچ میں بھارت نے پاکستان کو 88 رنز سے شکست دے دی۔

کولمبو میں کھیلےگئے میچ میں پاکستان ویمن ٹیم کی کپتان فاطمہ ثنا نے ٹاس جیت کر بھارت کو بیٹنگ کی دعوت دی۔

بھارت نے پہلےکھیلتے ہوئے 10 وکٹوں کے نقصان پر 247 رنز بنائے، جواب میں پاکستانی ٹیم 159 رنز بنا کر آؤٹ ہوگئی۔

اس سے قبل بھارتی ویمن کرکٹ ٹیم پچاسویں اوور کی آخری گیند پر 247 رنز بنا کر آؤٹ ہوگئی۔

ایک روزہ کرکٹ میں بھارتی ٹیم پاکستان ویمن کے خلاف پہلی بار آل آؤٹ ہوئی ۔

بھارتی اننگز میں ہرلین دیول 46 رنز کے ساتھ نمایاں رہیں، رچا گوش نے 35 اور جمائما روڈریگز نے 32 رنز بنائے، پرتیکا راول نے 31 رنز کی اننگ کھیلی۔

پاکستان کی جانب سے ڈیانا بیگ نے 4 وکٹیں حاصل کیں۔ ان کے علاوہ سعدیہ اقبال اور فاطمہ ثنا نے 2،2 وکٹیں حاصل کیں۔

248 رنز کے ہدف کے تعاقب میں پاکستان کی پوری ٹیم 43 ویں اوور میں 159 رنز بنا کر آؤٹ ہوگئی۔

پاکستان کی جانب سے سدرہ امین 81 رنز بنا کر نمایاں رہیں، ان کے علاوہ نتالیہ پرویز نے 33 اور سدرہ نواز نے 14 رنز بنائے جب کہ کوئی اور بیٹر ڈبل فیگر میں داخل نہ ہوسکی۔

بھارت کی جانب سے کرانتی گوڈ اور دیپتی شرما نے 3،3 وکٹیں لیں، سنہے رانا نے 2 کھلاڑیوں کو آؤٹ کیا۔

بھارت کی ویمن ٹیم نے بھی مینز ٹیم کے نقش قدم پر چلتے ہوئے پاکستانی کھلاڑیوں سے ہینڈ شیک نہیں کیا، ٹاس کے بعد دونوں ٹیموں کی کپتان نے پریزنٹر سے گفتگو کی تاہم ہاتھ نہیں ملائے۔