فیض حمید کی سزا ابتدا، لمبا چوڑا انصاف کا سلسلہ اب رکے گا نہیں، فیصل واوڈا
اسلام آباد (اے ون نیوز) سینیٹر فیصل واوڈا نے کہا ہے کہ سابق لیفٹیننٹ جنرل فیض حمید کی سزا ابتداء ہے، 9 مئی کے کیسز باقی ہیں، یہ لمبا چوڑا انصاف کا سلسلہ اب نہیں رکے گا۔
نجی ٹی وی سے گفتگو کرتے ہوئے سینیٹر فیصل واوڈا کا کہنا تھا کہ فیض حمید پر جب 9 مئی کے کیسز سامنے آگئے تو اس سیاسی پارٹی کا کیا ہوگا جس نے 9 مئی کیا، فیض حمید کے ساتھ جو سیاسی جماعت شامل تھی اس کا احتساب ہو رہا ہے، اب بنیاد رکھ دی گئی ہے کہ پاکستان سے بڑا کوئی نہیں۔
انہوں نے کہا کہ 9 مئی کا ٹرائل چل رہا ہے جب اس کا فیصلہ سامنے آئے گا تو 14 سال کم از کم سزا ہوگی، پھر پی ٹی آئی اور بانی کہاں جائیں گے؟
ان کا کہنا تھا کہ میں پارٹی کو اس طرح کی چیزوں سے روکتا تھا اور کہتا تھا کہ واپسی کا راستہ نہیں ملے گا، انہوں نے مجھے ہی پارٹی سے نکال دیا گیا، اب ملک میں احتساب کا عمل شروع ہو گیا ہے، لمبا چوڑا انصاف کا سلسلہ شروع ہوا ہے جو رکے گا نہیں، اب کسی کو نہیں چھوڑا جائے گا۔
فیصل واوڈا نے کہا کہ ابھی صحافی ارشد شریف کا کیس بھی باقی ہے جس دن مراد سعید سامنے آگئے اس کیس کے کردار بھی سامنے آ جائیں گے۔
