کینبرا (اے ون نیوز) سڈنی کے ساحلی علاقے بونڈائی بیچ میں فائرنگ کے واقعے کے دوران حملہ آور کو قابو میں کر کے درجنوں جانیں بچانے والے شامی نژاد شہری احمد الاحمد کو ان کی بہادری کے اعتراف میں 25 لاکھ ڈالر کا چیک دیا گیا ہے۔
العربیہ کے مطابق احمد الاحمد کو یہ رقم انسٹاگرام کی معروف عوامی شخصیت زیکری ڈیرینیوسکی نے پیش کی، جنہوں نے اس ملاقات کی ویڈیو بھی اپنے سوشل میڈیا اکاؤنٹ پر شیئر کی۔ ڈیرینیوسکی کے مطابق یہ رقم دنیا بھر سے 43 ہزار افراد نے اجتماعی طور پر عطیہ کی، تاکہ احمد الاحمد کی غیر معمولی جرات کو سراہا جا سکے۔
ویڈیو میں دیکھا جا سکتا ہے کہ 43 سالہ احمد الاحمد ہسپتال کے بستر پر لیٹے ہیں اور ان کے بائیں ہاتھ پر پلاسٹر لگا ہوا ہے۔ فائرنگ کے واقعے کے دوران انہیں کندھے میں کئی گولیاں لگی تھیں۔ جب انہیں چیک دیا گیا تو انہوں نے حیرت سے سوال کیا، ’’کیا میں واقعی اس کا حقدار ہوں؟‘‘
احمد الاحمد نے واقعے کو یاد کرتے ہوئے کہا کہ جب انہوں نے لوگوں کو بچایا تو یہ سب دل سے کیا، کسی صلے یا انعام کی نیت نہیں تھی۔
واضح رہے کہ بونڈائی بیچ پر ہونے والی اس فائرنگ میں دو حملہ آوروں نے اندھا دھند گولیاں چلائیں، جس کے نتیجے میں 15 افراد ہلاک اور کم از کم 42 زخمی ہوئے۔ یہ واقعہ آسٹریلیا کی تاریخ کے مہلک ترین فائرنگ کے واقعات میں شمار کیا جا رہا ہے۔
