اسلام آباد (اے ون نیوز) پاکستان تحریک انصاف کے بانی چیئرمین عمران خان کے دونوں بیٹے، سلمان اور قاسم، پاکستان آنے والے ہیں۔ پارٹی قیادت نے ان کی آمد کی تصدیق کر دی ہے، تاہم قیام اور ملاقات کی تفصیلات فی الحال منظر عام پر نہیں لائی گئیں۔
علیمہ خان، سلمان اکرم راجہ، اور بیرسٹر علی ظفر نے میڈیا سے گفتگو میں بتایا کہ دونوں بیٹے اپنے والد سے ملاقات کے لیے اسلام آباد ہائیکورٹ سے رجوع کر رہے ہیں۔ ان کا کہنا تھا کہ ملاقات ان کا آئینی حق ہے، اور وہ اس میں کسی قانونی رکاوٹ کو برداشت نہیں کریں گے۔
اڈیالہ جیل کے باہر میڈیا گفتگو
بیرسٹر علی ظفر، علیمہ خان اور دیگر رہنماؤں نے اڈیالہ جیل کے باہر میڈیا سے گفتگو کرتے ہوئے کہا کہ صبح سے اجازت طلب کی جا رہی ہے لیکن تاحال داخلے کی اجازت نہیں دی گئی۔ ان کے مطابق عدالت کے واضح احکامات کے باوجود وکلاء اور فیملی کو ٹرائل میں شامل ہونے سے روکا جا رہا ہے۔
سلمان اکرم راجہ نے الزام لگایا کہ نہ صرف عمران خان سے ملاقات روکی جا رہی ہے بلکہ میڈیا کو بھی رسائی سے محروم رکھا گیا ہے، جو آئینی اور جمہوری اصولوں کے خلاف ہے۔
توشہ خانہ ٹو کیس پر ردعمل
علیمہ خان نے ’’توشہ خانہ ٹو‘‘ کیس کو ناجائز قرار دیتے ہوئے کہا کہ ہمیں نہیں معلوم اندر کیا ہو رہا ہے، لیکن ہم اپنے بھائی کے ساتھ کھڑے ہیں۔ ان کا کہنا تھا کہ ’’یہ لوگ ہمیں ڈرا نہیں سکتے، اور جب تک بانی چیئرمین کو رہائی نہیں ملتی، ہم خاموش نہیں بیٹھیں گے۔‘‘
