سیف علی خان پر جس گھر میں حملہ ہوا وہ کتنا بڑا اور اس کی قیمت کیا ہے؟،جانیں

ممبئی (اے ون نیوز) بالی ووڈ کے معروف اداکار سیف علی خان پر جس گھر میں حملہ ہوا ہے وہ ممبئی کے پوش علاقے باندرہ ویسٹ میں موجود ہے اور اس کی قیمت 48 کروڑ روپے (تقریباً ایک ارب 55 کروڑ پاکستانی روپے) ہے۔

این ڈی ٹی وی کے مطابق سیف علی خان اور کرینہ کپور خان ممبئی کے پوش علاقے باندرہ ویسٹ میں رہتے ہیں۔ یہ علاقہ انتہائی مہنگے گھروں اور مشہور شخصیات کی رہائش کے لیے جانا جاتا ہے۔ یہ سلیبریٹی جوڑا ستگرو شرن نامی 12 منزلہ عمارت میں رہتا ہے جسے انہوں نے 2013 میں 48 کروڑ روپے میں خریدا تھا۔

ان کا گھر چار منزلوں پر محیط ہے جس میں ہر منزل پر ایک تین بی ایچ کے (بیڈ روم، ہال، کچن) اپارٹمنٹ شامل ہے۔ مجموعی طور پر یہ گھر تین ہزار سکوائر فٹ پر پھیلا ہوا ہے جس میں ایک خاص چھت اور سوئمنگ پول بھی شامل ہیں۔ اس عمارت میں قیمتیں 70 ہزار روپے فی مربع فٹ ہیں جو باندرہ ویسٹ کے عام نرخوں سے زیادہ ہیں۔ اس سے قبل، سیف اور کرینہ فارچون ہائٹس نامی عمارت میں رہتے تھے جو ان کے موجودہ گھر کے قریب ہی واقع ہے۔

سیف علی خان اور کرینہ کپور خان کی جائیدادوں میں پٹودی پیلس، فارچون ہائٹس میں ایک اپارٹمنٹ، ممبئی میں دو بنگلے، اور سوئٹزرلینڈ کے گسٹاد میں ایک لگژری چالیٹ شامل ہیں جہاں یہ جوڑا زیادہ تر سردیوں کی چھٹیاں گزارتا ہے۔ یہ جوڑا نئے سال کا جشن بھی گسٹاد میں منانے کے بعد حال ہی میں ممبئی واپس آیا تھا۔ سیف اور کرینہ کا باندرہ والا گھر ان کی منفرد اور شاہانہ پسند کا عکاس ہے۔ اس کے اندرونی حصے کو ونٹیج اور شاہی انداز میں ڈیزائن کیا گیا ہے جو ان کی ذاتی دلچسپی کو ظاہر کرتا ہے۔