برازیلیا (اے ون نیوز) معروف پاپ سٹار لیڈی گاگا نے برازیل کے شہر ریو ڈی جنیرو کے مشہور کوپاکبانا بیچ پر ایک تاریخی مفت کنسرٹ پیش کیا، جس میں شہر کی انتظامیہ کے مطابق دو ملین سے زائد افراد نے شرکت کی۔ یہ لیڈی گاگا کے کیریئر کا سب سے بڑا کنسرٹ تھا، جسے شہر کی معیشت کو فروغ دینے کے مقصد سے منعقد کیا گیا۔
یہ کنسرٹ لیڈی گاگا کے آٹھویں البم "Mayhem” کی پروموشن کا حصہ تھا، جس میں "Abracadabra” اور "Die With a Smile” جیسے گانے شامل ہیں۔ لیڈی گاگا نے برازیل میں آخری بار 2012 میں پرفارم کیا تھا۔
امریکی محکمہ خارجہ کی سابق ملازمہ نے لاکھوں ڈالر چوری کرلیے، لیکن کیا طریقہ اختیار کیا کہ کئی سال پکڑی نہ جاسکی؟
بی بی سی کے مطابق کنسرٹ کیلئے ہزاروں مداح صبح سویرے سے قطاروں میں لگے ہوئے تھے تاکہ بیچ کے اندر رسائی حاصل کر سکیں۔ سیکیورٹی کے سخت انتظامات کیے گئے تھے، جن میں پانچ ہزار پولیس اہلکار، میٹل ڈیٹیکٹرز، ڈرونز، اور فیس ڈیٹیکشن کے کیمرے شامل تھے۔
لیڈی گاگا نے برازیل کی قومی فٹبال ٹیم سے متاثر ملبوسات پہن کر مختلف پرفارمنسز دیں۔ انہوں نے "Poker Face”، "Alejandro”، اور "Abracadabra” جیسے مشہور گانوں پر پرفارم کیا اور مداحوں نے بڑی سکرینوں پر ان کی پرفارمنس دیکھی، قوس قزاح کے رنگوں سے سجے پرچم لہرائے، اور جوش و خروش سے گاتے رہے۔
کنسرٹ کے اختتام پر لیڈی گاگا نے جذباتی انداز میں کہا: "ہم مونسٹرز ہیں، اور مونسٹرز کبھی نہیں مرتے۔” اس کے بعد انہوں نے اپنا مشہور گانا "Bad Romance” پیش کر کے کنسرٹ کا اختتام کیا۔
ریو ڈی جنیرو میں اس سے قبل بھی بڑے پیمانے پر مفت کنسرٹس ہو چکے ہیں، جن میں مئی 2024 میں مڈونا کا کنسرٹ بھی شامل ہے، جو شہر نے ہی سپانسر کیا تھا۔
