ہماچل پردیش (اے ون نیوز) بھارت کی شمالی ریاست ہماچل پردیش کے قبائلی علاقے میں ہاٹی قبیلے کے دو بھائیوں نے روایتی رواج کے تحت ایک ہی خاتون سے شادی کر لی، جس میں گاؤں بھر کے افراد نے بھرپور شرکت کی۔
یہ شادی ریاست کے ضلع سرمور کے گاؤں شیلائی میں منعقد ہوئی، جہاں سنیتا چوہان نامی دلہن نے دو بھائیوں – پرادیپ اور کپیل نیگی – کو اپنا شوہر تسلیم کیا۔ دلہن اور دولہوں نے واضح کیا کہ یہ فیصلہ دونوں خاندانوں نے باہمی رضامندی سے اور بغیر کسی دباؤ کے کیا۔
شادی کی تقریبات تین دن جاری رہیں، جن میں مقامی رقص، فوک گیت اور روایتی رسومات شامل تھیں۔ بتایا جاتا ہے کہ اس علاقے میں ایسے رواج کو "جاجدارا” کہا جاتا ہے، جو قدیم قبائلی روایت ہے اور جس کے تحت بھائی اپنی زمین اور خاندان کو متحد رکھنے کے لیے ایک ہی خاتون سے شادی کرتے ہیں۔
قبائلی بزرگوں اور ماہرین کے مطابق، اس رسم کا مقصد آبائی زمینوں کو تقسیم ہونے سے بچانا، خاندانی اتحاد کو برقرار رکھنا، اور زرعی ذمہ داریوں کو مؤثر طریقے سے نبھانا ہوتا ہے۔ وقت کے ساتھ یہ روایت کم ہوتی جا رہی ہے، لیکن اب بھی کچھ دیہی علاقوں میں قائم ہے۔
کپیل نیگی، جو بیرون ملک مقیم ہیں، نے کہا کہ وہ اس فیصلے پر خوش ہیں کیونکہ اس سے خاندان میں ہم آہنگی اور اعتماد پیدا ہوتا ہے۔
قبائلی تنظیم "کندریا ہاٹی سمیٹی” کے مطابق، اس رسم کی جڑیں کئی صدیوں پرانی ہیں اور یہ روایت اب صرف چند علاقوں تک محدود رہ گئی ہے۔
