راولپنڈی (اے ون نیوز) پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف فیلڈ مارشل سید عاصم منیر نے امریکہ کا سرکاری دورہ کیا، جہاں انہوں نے امریکی سیاسی و عسکری قیادت کے ساتھ ساتھ پاکستانی نژاد کمیونٹی سے بھی ملاقاتیں کیں۔
ٹیمپا میں، آرمی چیف نے امریکی سینٹرل کمانڈ کے سبکدوش ہونے والے کمانڈر جنرل مائیکل ای کوریلا کی ریٹائرمنٹ تقریب اور نئے کمانڈر ایڈمرل بریڈ کوپر کے چارج سنبھالنے کی تقریب میں شرکت کی۔ فیلڈ مارشل نے جنرل کوریلا کی قیادت کو سراہا اور ایڈمرل کوپر کے لیے نیک خواہشات کا اظہار کرتے ہوئے مشترکہ سیکیورٹی چیلنجز میں تعاون جاری رکھنے کے عزم کا اعادہ کیا۔
انہوں نے چیئرمین جوائنٹ چیفس آف اسٹاف جنرل ڈین کین سے بھی ملاقات کی، جس میں باہمی پیشہ ورانہ امور پر گفتگو ہوئی اور انہیں پاکستان کے دورے کی دعوت دی گئی۔
امریکہ میں مقیم پاکستانی برادری سے خطاب کرتے ہوئے فیلڈ مارشل نے کہا کہ بیرون ملک مقیم پاکستانی، پاکستان کے روشن مستقبل پر اعتماد رکھیں اور سرمایہ کاری میں فعال کردار ادا کریں۔ پاکستانی کمیونٹی نے ترقی اور خوشحالی میں اپنا بھرپور تعاون جاری رکھنے کے عزم کو دہرایا۔
یہ فیلڈ مارشل عاصم منیر کا رواں سال امریکہ کا دوسرا سرکاری دورہ ہے۔ اس سے قبل جون میں انہوں نے امریکی صدر ڈونلڈ ٹرمپ سے وائٹ ہاؤس میں ملاقات کی تھی، جس میں دوطرفہ تعلقات اور خطے کی صورتحال پر تبادلہ خیال ہوا تھا۔
