سڈنی (اے ون نیوز) آسٹریلیا کے معروف کاروباری و سماجی رہنما کامل خان کی جانب سے ایک پُرتکلف افطار ڈنر کا اہتمام کیا گیا، جس میں پاکستانی کمیونٹی کی بڑی تعداد نے شرکت کی۔
اس شاندار تقریب میں پاکستان کے قونصل جنرل قمر زمان ملک اور آسٹریلوی کرکٹ لیجنڈ بریٹ لی نے خصوصی طور پر شرکت کی، جس سے یہ محفل مزید یادگار بن گئی۔افطار ڈنر کے دوران کامل خان نے حاضرین کا شکریہ ادا کرتے ہوئے کہا کہ ایسے اجتماعات نہ صرف کمیونٹی کے افراد کو قریب لاتے ہیں بلکہ دوستی، بھائی چارے اور ثقافتی ہم آہنگی کو بھی فروغ دیتے ہیں۔
انہوں نے آسٹریلیا میں مقیم پاکستانی کمیونٹی کے اتحاد اور مثبت کردار کو سراہتے ہوئے کہا کہ ہمیں ایک دوسرے کی کامیابیوں کا حصہ بننا چاہیے اور اپنی نئی نسل کو بہتر مواقع فراہم کرنے کے لیے مل کر کام کرنا چاہیے۔قونصل جنرل قمر زمان ملک نے اپنے خطاب میں پاکستانی کمیونٹی کے کردار اور خدمات کو سراہا۔
انہوں نے کہا کہ پاکستانی کمیونٹی آسٹریلیا میں نہایت متحرک اور کامیاب ہے، اور ان کے مثبت اقدامات دونوں ممالک کے تعلقات کو مزید مستحکم بنانے میں معاون ثابت ہو رہے ہیں۔تقریب میں شریک آسٹریلوی کرکٹ اسٹار بریٹ لی نے بھی اپنے خیالات کا اظہار کرتے ہوئے پاکستان کے ساتھ اپنی محبت اور کرکٹ کے تجربات شیئر کیے۔
انہوں نے پاکستانی کرکٹ شائقین کی محبت اور جذبے کو سراہتے ہوئے کہا کہ پاکستان میں ہمیشہ ان کا خیرمقدم کیا گیا، اور وہ پاکستانی کھلاڑیوں کی صلاحیتوں کے بھی معترف ہیں۔اس موقع پر مختلف کاروباری شخصیات، سماجی رہنماؤں اور کمیونٹی کے معززین نے بھی شرکت کی اور آپس میں خیالات کا تبادلہ کیا۔
تقریب کے اختتام پر کامل خان نے تمام معزز مہمانوں کا شکریہ ادا کیا اور اس بات کا اعادہ کیا کہ مستقبل میں بھی ایسے اجتماعات منعقد کیے جائیں گے تاکہ پاکستانی کمیونٹی کو مزید قریب لایا جا سکے۔
یہ پُروقار محفل نہ صرف رمضان المبارک کی روحانی برکتوں سے معمور تھی بلکہ اس نے کمیونٹی کے اتحاد اور بھائی چارے کو بھی مزید تقویت بخشی۔
