ابو ظہبی (اے ون نیوز) شارجہ پولیس نے ایک ویڈیو جاری کی ہے جس میں رہائشیوں کو خبردار کیا گیا ہے کہ بھکاری جذباتی استحصال کے ذریعے پیسہ بٹور رہے ہیں، اور بھیک مانگنا ایک پیشہ بن چکا ہے۔
پولیس نے ایک حقیقی تجربہ کیا جس میں ایک شخص کو بھکاری کا کردار دے کر سڑک پر بھیجا گیا تاکہ یہ معلوم کیا جا سکے کہ وہ ایک گھنٹے میں کتنی رقم اکٹھی کر سکتا ہے۔
ویڈیو میں دیکھا جا سکتا ہے کہ وہ شخص سڑک پر بھیک مانگ رہا ہے اور راہگیر اس کی مدد کے لیے اسے رقم دے رہے ہیں۔
حیران کن طور پر صرف ایک گھنٹے میں اس نے 367 درہم (تقریباً 28 ہزار روپے) اکٹھے کر لیے، جس سے ظاہر ہوتا ہے کہ بھکاری بغیر کسی حقیقی ضرورت کے رمضان جیسے مقدس مہینے میں لوگوں کی ہمدردی کا فائدہ اٹھا کر بڑی رقم کما سکتے ہیں۔ پولیس نے شہریوں سے اپیل کی کہ وہ ایسے افراد کو رقم نہ دیں بلکہ مستند فلاحی اداروں کے ذریعے عطیات دیں۔
خلیج ٹائمز کے مطابق پولیس کا کہنا ہے کہ عطیہ دینا ایک ذمہ داری ہے جبکہ بھیک مانگنا ایک جرم ہے۔ دبئی پولیس نے رمضان کے پہلے 10 دنوں میں 33 بھکاریوں کو گرفتار کیا۔ یہ افراد مختلف ممالک سے تعلق رکھتے تھے اور انہیں "ایک باشعور معاشرہ، بھکاریوں سے پاک” کے عنوان سے جاری مہم کے تحت پکڑا گیا۔
متحدہ عرب امارات میں بھیک مانگنا ایک جرم ہے، جس پر پانچ ہزار درہم جرمانہ اور تین ماہ قید کی سزا ہو سکتی ہے۔ اگر کوئی بھکاریوں کا گروہ چلاتا ہے یا غیر ملکیوں کو اس مقصد کے لیے بھرتی کرتا ہے، تو اسے چھ ماہ قید اور ایک لاکھ درہم تک جرمانہ ہو سکتا ہے۔ اسی طرح بغیر اجازت چندہ اکٹھا کرنے پر پانچ لاکھ درہم تک کا جرمانہ عائد ہو سکتا ہے۔
