اسلام آباد (اے ون نیوز)برطانیہ نے ورک ویزا کے لیے انگریزی زبان کی شرط مزید سخت کردی گئی اور کہا گیا B2 لیول کی انگریزی پیشہ ورانہ سطح پر کام کرنے کے لیے ضروری ہے۔
تفصیلات کے مطابق برطانوی حکومت نے غیر ملکی ملازمین کے لیے انگریزی زبان کی اہلیت کا معیار بڑھا دیا ہے۔ اب اسکلڈ ورکر، اسکیل اپ اور ہائی پوٹینشل انفرادی (HPI) ویزا کے لیے درخواست دینے والوں کو اے لیول (A-Level) درجے کی انگریزی زبان کی مہارت ثابت کرنا ہوگی۔
برطانوی ہوم آفس نے بتایا کہ یہ اقدام اس لیے کیا گیا ہے تاکہ ملک میں آنے والے افراد برطانوی معاشرے میں بہتر طور پر گھل مل سکیں اور مؤثر انداز میں بات چیت کر سکیں۔
نئی پالیسی سے درمیانے درجے کے ہنرمند اور ٹیکنیکل ورکرز کی آمد میں سالانہ ایک لاکھ تک کمی کا امکان ہے۔
ماہرین کا کہنا ہے کہ B2 لیول کی انگریزی پیشہ ورانہ سطح پر کام کرنے کے لیے ضروری ہے، تاہم ناقدین کے مطابق یہ سختی برطانیہ کی ورک فورس پر منفی اثر ڈال سکتی ہے۔
حکام نے اشارہ دیا ہے کہ مستقبل میں دیگر ویزا اقسام کے لیے بھی زبان کے نئے تقاضے متعارف کرائے جا سکتے ہیں، جس سے برطانوی امیگریشن نظام میں بڑی تبدیلی متوقع ہے۔
دوسری جانب برطانیہ نے اسٹینڈرڈ ویزٹر ویزا کے لیے بھی نئی گائیڈ لائنز جاری کر دی ہیں۔ یہ ویزا سیاحت، کاروبار، خاندانی ملاقات، قلیل مدتی تعلیم یا علاج معالجے کے لیے جاری کیا جاتا ہے، جس کے تحت زیادہ سے زیادہ چھ ماہ قیام کی اجازت ہوتی ہے۔
ویزٹر ویزا کی فیس £127 سے شروع ہو کر £1,059 تک ہے، جبکہ تیز تر کارروائی کے لیے پریارٹی سروس £500 اور سپر پریارٹی سروس £1,000 میں دستیاب ہے۔
امیگریشن حکام نے خبردار کیا ہے کہ ویزٹر ویزا کو طویل قیام یا ملازمت کے مقصد کے لیے استعمال نہ کیا جائے، ورنہ درخواست مسترد کی جا سکتی ہے۔
یہ بھی ضرور پڑھیں………
پاکستان نےدوحہ مذاکرات میں طالبان کے سامنے اپنا موقف پیش کر دیا
