واشنگٹن (اے ون نیوز) دنیا بھر میں ایک بار پھر متعدد آن لائن پلیٹ فارمز بیک وقت تب متاثر ہوئے جب کلاؤڈ فلیئر کے سسٹم میں اچانک خرابی پیدا ہوئی۔ اس خرابی کے باعث سوشل میڈیا پلیٹ فارم X (سابقہ ٹویٹر)، OpenAI، League of Legends جیسے مقبول گیمز سمیت کئی بڑی ویب سائٹس گھنٹوں تک ٹھپ رہیں۔
کلاؤڈ فلیئر نے اپنی آفیشل اسٹیٹس ویب سائٹ پر بتایا کہ ان کی ٹیم "مسئلے سے آگاہ ہے اور تحقیقات جاری ہیں۔” کمپنی کے مطابق اس وقت سروسز بحالی کے مرحلے میں ہیں، مگر کچھ صارفین کو اب بھی معمول سے زیادہ ایررز کا سامنا ہو سکتا ہے۔
دلچسپ بات یہ ہے کہ آؤٹج رپورٹس دکھانے والی ویب سائٹ Downdetector بھی ابتدا میں آف لائن ہو گئی، کیونکہ وہ بھی کلاؤڈ فلیئر کی سروسز استعمال کرتی ہے۔ تھوڑی دیر بعد اس کی بحالی ممکن ہوئی، مگر دیگر ویب سائٹس بدستور "Internal Server Error” اور 500 جیسے ایررز دکھاتی رہی۔
یہ خرابی تقریباً صبح 6 بجے (مشرقی وقت) سامنے آئی، جب کلاؤڈ فلیئر کے سپورٹ پورٹل فراہم کنندہ نے سسٹم مسائل رپورٹ کیے۔ اس کے بعد X، Canva، اور متعدد گیم سرورز ایک ساتھ متاثر ہوئے۔ League of Legends اور Valorant کے ہزاروں کھلاڑی سرور سے کنیکٹ نہ ہونے کی شکایات کرتے نظر آئے۔
کلاؤڈ فلیئر کے مطابق ان کی ٹیمیں مکمل تحقیقات کر رہی ہیں۔ اس دوران کمپنی کی اپنی اسٹیٹس ویب سائٹ بھی جزوی طور پر خراب ہوئی اور اس کی CSS اسٹائلنگ متاثر ہو گئی۔
متعدد صارفین کو ویب براؤز کرتے ہوئے "Please unblock challenges.cloudflare.com to proceed” جیسے میسجز ملے، جبکہ OpenAI پر بھی یہی مسئلہ سامنے آیا، تاہم ChatGPT نے نسبتاً جلدی بحالی دکھائی۔
کمپنی کا کہنا ہے کہ یہ مسئلہ صارفین کی کسی غلطی کی وجہ سے نہیں بلکہ کلاؤڈ فلیئر کے سیکیورٹی سسٹمز میں تکنیکی خرابی کے باعث ہوا ہے۔ سیکیورٹی سسٹمز ناکام ہونے کے باوجود ویب سائٹس خود بیک اینڈ پر چل رہی ہیں، مگر رسائی متاثر رہ سکتی ہے۔
مزید تفصیلات کلاؤڈ فلیئر کی جانب سے تحقیقات مکمل ہونے کے بعد جاری کی جائیں گی۔
