اسلام آباد(اے ون نیوز)اسلام آباد ائیرپورٹ پر غیر ملکی ائیر لائن کا طیارہ لینڈنگ کے دوران ہولناک حادثے سے بچ گیا۔
پاکستان ائیرپورٹس اتھارٹی کے ذرائع کے مطابق ائیر ٹریفک کنٹرولرکے بروقت اقدام نے طیارے کو بند رن وے پر لینڈنگ کرنے سے روک دیا۔
ذرائع کے مطابق سعودی ائیرلائن کی پرواز نمبر 728 جدہ سے اسلام آباد پہنچی تھی۔ اسلام آباد ائیرپورٹ کا رن وے 28 لیفٹ مرمت کے لیے بند ہے۔ پاکستان ائیرپورٹس اتھارٹی نے رن وے 28 لیفٹ بند ہونے اور رن وے 28 رائٹ کھلے ہونےکا نوٹم بھی جاری کیا ہوا ہے۔
ذرائع کے مطابق سعودی ائیرلائن کے پائلٹ نے لینڈنگ اپروچ 28 رائٹ کے بجائے 28 لیفٹ کے بند رن وےکی بنائی۔کنٹرول ٹاور پر موجود ائیرٹریفک کنٹرولر نے طیارے کے پائلٹ کو غلط رن وے پر ہونےکا بتایا۔
ذرائع کا کہنا ہےکہ غیر ملکی ائیرلائن کا پائلٹ آخر وقت تک کہتا رہا کہ وہ ٹھیک رن وے پر ہے۔ ائیرٹریفک کنٹرولر نے عین وقت پر پائلٹ کو لینڈنگ سے روک کر دوبارہ چکر لگانےکو کہا۔
ذرائع کے مطابق دوسری کوشش میں سعودی ائیرلائن کے بوئنگ 777 طیارے نے درست رن وے پر لینڈکیا۔
ذرائع کے مطابق جس وقت طیارے نے 28 لیفٹ پر لینڈنگ اپروچ بنائی اس وقت رن وے پر بڑی تعداد میں لوگ اور گاڑیاں موجود تھیں۔ غلط رن وے پر لینڈنگ ہو جاتی تو سنگین حادثہ پیش آسکتا تھا۔
ذرائع کا کہنا ہےکہ سعودی ائیرلائن کے بوئنگ 777 طیارے میں سیکڑوں مسافر موجود تھے۔
ترجمان کا کہنا ہے کہ پاکستان ائیرپورٹس اتھارٹی نے واقعےکا نوٹس لے لیا ہے۔
