لاہور (اے ون نیوز) شوکت خانم ہسپتال کی انتظامیہ نے ادارے کے بعض بینک اکاؤنٹس منجمد ہونے کی تصدیق کردی۔ عدالت نے علیمہ خان کے پیش نہ ہونے پر شوکت خانم کے اکاؤنٹس منجمد کیے تھے۔
ہسپتال انتظامیہ نے اپنے بیان میں کہا ” ہم اپنے ڈونرز اور سپورٹرز کو یہ یقین دلانا چاہیں گے کہ ہمارے بینک اکاؤنٹس کی اکثریت مکمل طور پر فعال ہے، اور ہمیں بغیر کسی رکاوٹ کے عطیات وصول ہو رہے ہیں۔
ہمارے اکاؤنٹس کی ایک قلیل تعداد پر پابندیاں عائد کی گئی تھیں، اور ہم ان پابندیوں کو جلد از جلد ہٹانے کے لیے کام کر رہے ہیں۔ ہمیں امید ہے کہ یہ پابندیاں جلد ہی ختم ہو جائیں گی۔”
بیان میں کہا گیا ہے”ہمیں یہ تصدیق کرتے ہوئے بھی خوشی ہے کہ مریضوں کی تمام دیکھ بھال اور علاج کی خدمات بلا تعطل جاری ہیں۔ ہم اپنے ڈونرز، اور درحقیقت، پاکستان کے تمام شہریوں کے، ہمارے مشن پر ان کے غیر متزلزل اعتماد کے لیے، تہہ دل سے شکر گزار ہیں ، خاص طور پر اب پہلے سے کہیں زیادہ ، ہمارے اس مشن میں جو کہ پاکستان بھر میں ہمارے 75فیصد سے زیادہ مریضوں کو مفت کینسر کی دیکھ بھال فراہم کرنا ہے۔”
