اسلام آباد(اے ون نیوز)وفاقی وزارت داخلہ نے سابق وزیراعظم اور پی ٹی آئی کے بانی عمران خان کے بیٹوں کی پاکستان آمد اور ویزا درخواست سے متعلق خبروں پر وضاحت جاری کر دی ہے۔
وزارت داخلہ کے ذرائع کے مطابق عمران خان کے بیٹے قاسم اور سلیمان کی کوئی ویزا درخواست اس وقت وزارت کے زیر غور نہیں ہے۔ ذرائع نے واضح کیا کہ وزارت داخلہ نہ تو فیملی ویزا جاری کرتی ہے اور نہ ہی اس نوعیت کے معاملات اس کے دائرہ اختیار میں آتے ہیں۔
ذرائع کے مطابق اس قسم کے ویزا معاملات براہ راست پاکستانی ہائی کمیشن یا وزارت خارجہ کے تحت آتے ہیں، اس لیے علیمہ خان کا وزارت داخلہ سے متعلق دیا گیا بیان درست نہیں۔
یاد رہے کہ علیمہ خان نے چند روز قبل دعویٰ کیا تھا کہ عمران خان کے بیٹوں نے لندن میں پاکستانی ہائی کمیشن میں ویزا درخواست جمع کرائی ہے اور ان کا کیس وزارت داخلہ میں زیر غور ہے۔ وزارت نے اب اس دعوے کی تردید کرتے ہوئے معاملے کو وزارت خارجہ کا دائرہ قرار دیا ہے۔
