لاہور(اے ون نیوز)پاکستان مسلم لیگ ن کے صدر اور سابق وزیراعظم میاں محمد نواز شریف نے 500 یونٹ تک بجلی استعمال کرنے والوں کیلئے 14روپے فی یونٹ ریلیف کا اعلان کردیا۔
وزیر اعلیٰ پنجاب مریم نواز کے ہمراہ صدر مسلم لیگ ن میاں نوازشریف نے لاہور میں پریس کانفرنس کرتے ہوئے کہا کہ مہنگائی کی وجہ سے عوام کرب سے گزررہے ہیں، مینارپاکستان جلسے میں بجلی کے بلوں سے متعلق گفتگوکی تھی، مینارپاکستان جلسے میں بتایامیرے دورمیں بجلی کا بل اورآج کتنا ہوگیا ہے۔
نواز شریف کا کہنا تھا کہ عوام کی تکالیف کومحسوس کررہا ہوں، باربارمیرا ذہن 2017کی طرف جاتا ہے، 2017میں مہنگائی کا نام ونشان نہیں اوربجلی کےبل انتہائی کم تھے،2013 میں ہم نے معیشت کو ٹھیک کیا، ہمارے زمانے میں 10،10روپے کلو سبزیاں ملتی تھیں۔
سابق وزیر اعظم نے نوازشریف نے کہا کہ میں آج بھی کہتا ہوں کہ مجھے کیوں نکالا؟ ان کو یہ بات مذاق لگتی ہے ، مجھے نکالنے کی کوئی مناسب وجہ تو بتاتے، مجھے اس لیے نکالا کہ بیٹے سے تنخواہ نہیں لی ، مجھے نکالنے والے ججز سے کسی نے نہیں پوچھا۔
سابق وزیراعظم کا کہنا تھا کہ اس ملک میں آئی ایم ایف کو کون لایا؟ جیل میں بیٹھ کر بڑی بڑی باتیں کرنے والا آئی ایم ایف کو دوبارہ لایا، مریم اور شہبازشریف کو کہتا ہوں کہ مہنگائی کا طوفان ختم کریں ، میرے دور میں ڈالر 104روپے کا تھا، مریم نے گندم ، آٹے کی قیمت کو کم کیا۔
ان کا کہنا تھا کہ ہم نے بجلی کی لوڈشیڈنگ کا خاتمہ کیا ، چین کے تعاون سے ہماری حکومت نے بجلی کے کارخانے لگائے، یہ مہنگائی بانی پی ٹی آئی کے دور سے شروع ہوئی ، مریم نواز بھی دن رات عوام کی خدمت کا سوچتی ہیں، پنجاب میں صفائی کے انتظامات بہتر کردیئے گئے ہیں۔
نوازشریف نے کہا کہ میں اقتدار کا خواہش مند نہیں ہوں ، میں نے ملک کی خدمت کی ہے ، ہم نے موٹر ویز اپنے وسائل سے بنائی ہیں، 2017 میں منتخب وزیر اعظم کو نکالنے کے ثبوت بھی موجود ہیں ، آخریہ سب کچھ کس نے کیا اور کون اس کا ذمہ دار ہے؟، اگر ترقی کا سفر جاری رہتا تو ہم آج ایشین ٹائیگر بن چکے ہوتے۔
ان کا کہنا تھا کہ مریم نواز بجلی کے بلوں کیلئے سولر پینل سکیم لے کر آرہی ہیں ، ہماری حکومت نے اگست اور ستمبر کے بجلی بلوں میں ریلیف دینے کا فیصلہ کیا ہے ، عوام کیلئے ایک اچھا ریلیف پیکیج تیار کیا ہے ، ہمارا فرض ہے موجودہ صورتحال کو ٹھیک کریں۔
صدر مسلم لیگ ن نے مزید کہا کہ 500یونٹ تک بجلی استعمال کرنے والوں کو 14روپے کا ریلیف ملے گا ، بجلی بلوں میں ریلیف دینے کیلئے 45ارب روپے مختص کیے ہیں ، ترقیاتی پیکیج کے فنڈز سے کٹوتی کرکے عوام کو ریلیف دیں گے۔
