ممبئی(اے ون نیوز)بولی وڈ کے مشہور اداکار سیف علی خان ممبئی میں اپنےگھر میں گھسنے والے شخص کے ہاتھوں چاقو کے حملے میں شدید زخمی ہوگئے، گھر میں گھسنے والا شخص اداکار پر چاقو کے 6 وار کرنے کے بعد فرار ہوگیا، اداکار کو ممبئی کے لیلاوتی ہسپتال منتقل کردیا گیا ہےجہاں ان کی ڈھائی گھنٹے طویل نیورو سرجری کی گئی ہے۔
بھارتی میڈیا کی رپورٹ کے مطابق ممبئی کے علاقے باندرہ میں بولی وڈ کے چھوٹے نواب سیف علی خان کے گھر میں ڈکیتی کا واقعہ رات تقریبا ڈھائی بجے پیش آیا، ایک شخص ان کے گھر میں گھس آیا، اداکار نے اسے قابو کرنے کی کوشش کی تو درانداز ان پر چاقو کے 6 وار کرنے کے بعد فرار ہوگیا، اسپتال کے عملے نے تصدیق کی کہ سیف علی خان اب خطرے سے باہر ہیں۔
لیلاوتی ہسپتال کے چیف آپریٹنگ آفیسر (سی او او) ڈاکٹر نیرج اتمانی نے بتایا کہ سیف علی خان کا ڈھائی گھنٹے طویل نیورو سرجری کی گئی ہے جبکہ پلاسٹک سرجری اب بھی جاری ہے، اداکار کی طبیعت کے حوالے سے ایک رپورٹ کا انتظار ہے۔
اداکار کے گھر میں دراندازی کرنے والے شخص کے خلاف باندرہ پولیس اسٹیشن میں ایف آئی آر درج کرلی گئی ہے، پولیس نے تصدیق کی ہے کہ اداکار اور ان کے گھر میں گھسنے والے شخص کے درمیان اس وقت ہاتھا پائی ہوئی بعد ازاں حملہ آور نے سیف علی خان پر چاقو کے 6 وار کیے اور جائے واردات سے فرار ہوگیا۔
لیلاوتی ہسپتال سے جاری بیان کے مطابق اداکار کے جسم پر 6 زخم آئے ہیں جن میں سے 2 گہرے اور ریڑھ کی ہڈی کے قریب ہیں، پولیس نے سیف علی خان کے 3 گھریلو ملازمین سے پوچھ گچھ کررہی ہے جبکہ ممبئی کرائم برانچ کو بھی تحقیقات کی ذمہ داری سونپی گئی ہے۔
کرائم برانچ نے مشتبہ شخص کی تلاش کے لیے 7 ٹیمیں تشکیل دی ہیں۔ ایک ٹیم سراغ کے لیے سی سی ٹی وی فوٹیجز کا جائزہ لے رہی ہے، تین ٹیمیں ممبئی کے مختلف علاقوں کو روانہ ہوگئی ہیں جبکہ ایک ٹیم مشتبہ شخص کی تلاش میں ممبئی سے باہر جائے گی۔
سیف علی خان کی ٹیم نے واقعے کے حوالے سے باضابطہ بیان جاری کیا ہے جس میں کہا گیا ہے کہ ’سیف علی خان کے گھر میں چوری کی کوشش کی گئی تھی، فی الحال وہ اسپتال میں سرجری کے مراحل سے گزر رہے ہیں، ہم میڈیا اور مداحوں سے درخواست کرتے ہیں کہ وہ صبر کریں، یہ پولیس کیس ہے، ہم آپ کو صورتحال سے باخبر رکھیں گے‘۔
کرینہ کپور کی ٹیم نے بھی اسی طرح کا بیان شیئر کرتے ہوئے کہا کہ باقی فیملی ٹھیک ہے۔
اداکارہ کی ٹیم کی جانب سے جاری بیان میں مزید کہا گیا ہے کہ ’سیف علی خان اور کرینہ کپور خان کی رہائش گاہ پر چوری کی کوشش کی گئی، سیف کا بازو زخمی ہوا تھا جس کے بعد وہ اسپتال میں زیر علاج ہیں، خاندان کے باقی افراد ٹھیک ہیں، ہم میڈیا اور مداحوں سے درخواست کرتے ہیں کہ وہ صبر کریں اور مزید قیاس آرائیاں نہ کریں کیونکہ پولیس پہلے ہی اپنی تحقیقات کر رہی ہے، آپ سب کی تشویش کے لیے شکریہ‘۔
لیلاوتی ہاسپٹل کے سی او او ڈاکٹر نیرج اتمانی نے بتایا کہ سیف علی خان کو باندرہ میں واقع ان کے گھر میں ایک نامعلوم شخص نے چاقو مار کر ہلاک کر دیا اور انہیں صبح تقریبا ساڑھے تین بجے اسپتال لایا گیا۔
نیورو سرجن ڈاکٹر نتن ڈانگے، کاسمیٹک سرجن ڈاکٹر لینا جین اور اینستھیسیولوجسٹ ڈاکٹر نیشا گاندھی کی قیادت میں ڈاکٹروں کی ایک ٹیم نے سیف علی خان کا آپریشن کیا۔
واضح رہے کہ سیف علی خان، کرینہ کپور خان اور ان کے بیٹے نئے سال کی تعطیلات کے لئے سوئٹزرلینڈ میں تھے اور گزشتہ ہفتے ہی ممبئی لوٹے تھے۔
