سیالکوٹ(اے ون نیوز)وفاقی تحقیقاتی ادارے (ایف آئی اے)نے سیالکوٹ ائیرپورٹ پر کارروائی کر کے قطر جانے والے 6 مسافروں کو گرفتار کرلیا۔
گوجرانوالہ ایف آئی اے کے مطابق گرفتار افراد کا تعلق گوجرانوالہ اور سیالکوٹ سے ہے جن کے پاسپورٹ پر قطر کے ورک پرمٹ ویزے تھے،جو قطر سے لیبیا اور پھر سمندری راستے سے اٹلی جانا چاہتے تھے۔
ایف آئی اے حکام کے مطابق قطر کے ذریعے یورپ جانے کا یہ ایک نیا روٹ سامنے آیا ہے، گرفتار افراد نے ایجنٹ کو 32 لاکھ روپے فی کس ادا کیے تھے۔
دوسری جانب ملتان ایف آئی اے نے بھی جنوبی پنجاب کے مختلف شہروں میں کارروائی کرکے انسانی اسمگلنگ اور ویزا فراڈ میں ملوث 7 ملزمان کو گرفتارکر لیا۔
ملزمان نے سادہ لو ح شہریوں کو بیرون ملک نوکریوں کا جھانسہ دیا اور ان سے لاکھوں روپے لیے ، ملزمان شہریوں کو بیرون ملک بھجوانے میں ناکام رہے اور انہیں رقم بھی واپس نہیں کی۔
ایف آئی اے کے مطابق تمام افراد کو گرفتار کر کے تفتیش کا آغاز کر دیا گیا ہے۔
