انقرہ(اے ون نیوز)ترک صدر رجب طیب اردوان نےکہا ہےکہ ‘خون کا پیاسا نیٹ ورک’ غزہ کے بعد ایران اور لبنان میں بھی اسکولوں اور اسپتالوں کو نشانہ بنا رہا ہے۔
گزشتہ روز استنبول یونیورسٹی میں منعقدہ افطار ڈنر سے خطاب میں علاقائی کشیدگی کے بارے میں بات کرتے ہوئے ترک صدر کا کہنا تھا کہ اس پاگل پن کی صورت حال کے خلاف ترکیے انسانیت کے حق میں کھڑا ہے، عقل کا علمبردار ہے اور بحرانوں کے حل کے لیے مکالمے اور سفارتکاری کی راہ اپناتا ہے۔
غزہ کی طرف اشارہ کرتے ہوئے ترک صدر نےکہا کہ دنیا نے وہ مناظر دیکھے ہیں جہاں انسانی زندگی کی کوئی قدر نہیں کی گئی اور عام شہریوں، اسپتال کی نرسری میں موجود بچوں اور اسکول جانے والے بچوں پر بھی بمباری کی گئی۔
انہوں نےکہا کہ غزہ کی جنگ کے دوران ڈاکٹروں، نرسوں اور دیگر طبی عملےکو بھی نشانہ بنایا گیا اور تقریباً 1700 طبی کارکن اسرائیل کی ریاستی دہشت گردی کے نتیجے میں شہید ہوئے۔
انہوں نےکہا کہ علاقائی صورتحال پر ترکیےکا مؤقف جغرافیائی یا اقتصادی مفادات کے بجائے انسانی اقدار اور انصاف پر مشتمل ہے، ہم انسانی مؤقف کو برقرار رکھیں گے جو واقعات کو تیل، سونا، قدرتی گیس یا معدنیات کی قیمت سے نہیں بلکہ انصاف، ہمدردی، رحمت اور انسانی وقار کے تناظر میں دیکھتا ہے۔
