جدہ(اے ون نیوز)سعودی عرب کے شہزادہ الولید بن خالد بن طلال بن عبدالعزیز، جنہیں دنیا بھر میں "سلیپنگ پرنس” کے نام سے جانا جاتا تھا، 20 سال طویل کومے کے بعد انتقال کر گئے۔
شاہی اعلان
سعودی پریس ایجنسی کے مطابق شاہی دیوان کی جانب سے جاری اعلامیے میں شہزادہ الولید کے انتقال کی تصدیق کی گئی۔ ان کی نمازِ جنازہ آج بروز ہفتہ، نمازِ عصر کے بعد امام ترکی بن عبداللہ مسجد، ریاض میں ادا کی جائے گی۔
کیا ہوا تھا؟
2005 میں ایک المناک ٹریفک حادثے کے بعد شہزادہ الولید شدید زخمی ہو گئے تھے اور اسی وقت سے کومے میں تھے۔ ان کی حالت گزشتہ دو دہائیوں سے عالمی توجہ کا مرکز بنی رہی اور سوشل میڈیا پر انہیں "سلیپنگ پرنس” کے طور پر جانا جانے لگا۔
والد کا جذباتی پیغام
سماجی رابطے کی ویب سائٹ "ایکس” (سابقہ ٹوئٹر) پر ان کے والد شہزادہ خالد بن طلال نے جذباتی پیغام شیئر کیا۔ انہوں نے کہا:”اللہ تعالیٰ پر کامل ایمان کے ساتھ اور دل گہرے دکھ سے بھرے ہوئے، ہم اپنے بیٹے شہزادہ الولید کے انتقال پر غمزدہ ہیں۔ اللہ ان پر رحم فرمائے۔”
