لاہور(اے ون نیوز)بانی چیئرمین پی ٹی آئی کی سابقہ اہلیہ ریحام خان نے شکوہ کیا ہے کہ انہوں نے خود سے کم عمر لڑکے سے شادی کی تو انہیں طعنے دئیے جانے لگے جبکہ ان کے پہلے شوہر ان سے 16اور دوسرے 22سال بڑے تھے،اگر ان کے شوہر کسی دوسری خاتون سے شادی کرنا چاہیں گے تو پھر وہ ان کے ساتھ نہیں رہ سکتیں۔
وہ شوہر کو دوسری عورت کے ساتھ نہیں بانٹ سکتیں۔ایک پوڈ کاسٹ میں ریحام خان نے یہ انکشاف بھی کیا کہ جس مرد سے انہوں تیسری شادی کی ان کی بھی ان سے تیسری شادی ہے ۔انہوں نے بتایا کہ مرزا بلال حسن سے تیسری بار رشتہ ازدواج میں بندھنے سے قبل انہوں نے شوہر کی پہلی بیویوں کے طلاق نامے دیکھ کر ان کے طلاق یافتہ ہونے کی تصدیق کی تھی۔
عام طور پر بعض مرد جھوٹ بولتے ہیں کہ ان کی طلاق ہوچکی ہے لیکن درحقیقت انہوں نے پہلی بیوی کو طلاق نہیں دی ہوتی، اس لیے انہوں نے تصدیق کے لیے اپنے شوہر کے تمام طلاق نامے بھی دیکھے تھے۔ریحام خان نے شکوہ کیا کہ انہیں یہ طعنے دیے جاتے ہیں کہ انہوں نے خود سے کم عمر مرد سے تیسری شادی کرلی جب کہ ایسے طعنے مردوں کو نہیں دئیے جاتے۔
انہوں نے مثال دی کہ انہوں نے پہلی شادی خود سے 16سال زائد العمر جب کہ دوسری شادی خود سے 22سال زائد العمر مرد سے کی لیکن لوگوں نے اس وقت مردوں کو طعنے نہیں دئیے۔ریحام خان نے یہ شکوہ بھی کیا کہ ان کے بارے میں ہر بار لکھا جاتا ہے کہ وہ طلاق یافتہ ہیں لیکن ان کے سابق شوہروں سے متعلق یہ نہیں لکھا جاتا۔
شوہر کو مزید شادیوں کی اجازت دینے کے سوال پر ریحام خان نے واضح کیا کہ وہ مرد کو ایک شادی پر پابند کرنے کی قائل نہیں، تاہم وہ ایک وقت میں ایک ہی بیوی رکھنے کے قائل ہیں، وہ کبھی نہیں چاہیں گی کہ ان کے حالیہ شوہر ان کے ہوتے ہوئے دوسری عورت سے شادی کریں۔انہوں نے واضح کیا کہ اگر ان کے شوہر کسی دوسری خاتون سے شادی کرنا چاہیں گے تو پھر وہ ان کے ساتھ نہیں رہ سکتیں، وہ شوہر کو دوسری عورت کے ساتھ نہیں بانٹ سکتیں۔
