لاہور(اے ون نیوز)ڈی جی پروونشل ڈزاسٹر منیجمنٹ اتھارٹی (پی ڈی ایم اے) پنجاب کا کہنا ہے کہ سیلاب کا خطرہ اس وقت پوری طرح ٹلا نہیں ہے۔
ڈی جی پی ڈی ایم اے عرفان علی کاٹھیا نے کہاکہ چناب میں پانی کا ریلا ہیڈ تریموں سے ملتان ہیڈ محمد والا کی طرف جارہا ہے، تریموں ہیڈ ورکس کو کوئی خطرہ نہیں۔
عرفان علی کاٹھیا نے کہاکہ ہیڈ قادر آباد میں بروقت بریچ کرنے کے ثمرات اب ہمیں نچلے اضلاع میں نظر آرہے ہیں، آج جھنگ میں رواز برج کی گنجائش کم اور پانی زیادہ تھا، بریچنگ سسٹم سے فائدہ ہوا۔
انہوں نے مزید کہا کہ چناب کا پانی کل ملتان پہنچے گا، ساتھ راوی کا پانی مل جائے گا۔ڈی جی پی ڈی ایم اے نے کہا کہ جو ریلا شاہدرہ سے گزرا وہ اب ہیڈ سدھنائی کے مقام پر پہنچ چکا ہے، ہیڈ سدھنائی گنجائش کے قریب پہنچ گیا ہے، بریچ کرنا پڑسکتا ہے۔
انہوں نے کہا کہ مائی صفورہ بند کے مقام پر ہمیں آج رات شگاف ڈالنا پڑے گا، مائی صفورہ بند کے قریب علاقوں سے 20 سے 24 ہزار افراد کا انخلا کردیا گیا ہے۔
عرفان علی کاٹھیا نے کہا کہ ایک ہی وقت میں 3 دریاؤں میں سپر فلڈ کی صورتحال ہے، جو بھی سخت فیصلے تھے وہ ہوئے اب ثمرات نظر آرہے ہیں۔
