واشنگٹن(اے ون نیوز)ایران جنگ پر ٹرمپ انتظامیہ کو بڑا جھٹکا لگ گیا ہے، اعلیٰ عہدیدار مستعفی ہوگئے۔
غیرملکی خبررساں ادارے کی رپورٹ کے مطابق نیشنل کاؤنٹر ٹیررازم سینٹر کے ڈائریکٹر جوکینٹ نے احتجاجاً استعفیٰ دے دیا ہے۔
جوکینٹ نے مؤقف اپنایا کہ ایران سے فوری کوئی خطرہ نہیں تھا، جنگ اسرائیل اور اس کی طاقتور لابی کے دباؤ پر شروع کی گئی ہے۔
انہوں نے لکھا کہ ایک ایسے شخص کے طور پر جس نے 11 مرتبہ جنگی خدمات انجام دیں اور اپنی اہلیہ کو اسرائیل کی شروع کی گئی جنگ میں کھویا، وہ نئی نسل کو ایسی جنگ میں بھیجنے کی حمایت نہیں کر سکتے جو امریکی عوام کے مفاد میں نہ ہو اور جس کی قیمت انسانی جانوں کی صورت میں ادا کرنی پڑے۔
جو کینٹ کے مستعفی ہونے پر وائٹ ہاؤس کی جانب سے فوری طور پر کوئی تبصرہ نہیں کیا گیا۔
وہ نیشنل کاؤنٹر ٹیررازم سینٹر کے سربراہ کے طور پر دہشت گردی کے خطرات کا تجزیہ کرنے اور ان کا پتہ لگانے والی ایجنسی کے انچارج تھے۔
صدر ڈونلڈ ٹرمپ کی انتظامیہ میں داخل ہونے سے پہلے کینٹ نے ریاست واشنگٹن میں کانگریس کے لیے دو ناکام مہم چلائی۔ انہوں نے فوج میں بھی خدمات انجام دیں، گرین بیریٹ کے طور پر 11 تعیناتیوں کو دیکھا، اس کے بعد سی آئی اے میں کام کیا۔
واضح رہے کہ ان کی اہلیہ شینن کینٹ 2019 میں شام میں خودکش بم دھماکے میں ہلاک ہوگئی تھیں۔
