لاہور(اے ون نیوز)ایٹلس ہونڈا نے یکم ستمبر 2026 کو پاکستان میں اپنی مقبول ترین موٹر سائیکل ’ہونڈا سی جی 125‘ کا نیا لائن اپ باضابطہ طور پر لانچ کر دیا ہے۔
اس نئی سیریز میں موٹر سائیکل کے بیرونی ڈیزائن میں تبدیلیوں کے ساتھ نئے باڈی گرافکس کو شامل کیا گیا ہے۔
کمپنی اس بار نئے ماڈلز کو ’دی ساؤنڈ آف پاور‘ کے سلوگن کے تحت پیش کر رہی ہے، جس میں بنیادی توجہ موٹر سائیکل کے انداز کو بہتر بنانے اور سواری کو آسان بنانے پر دی گئی ہے۔
نئے لائن اپ کی تفصیلات کے مطابق اس بار مکینیکل تبدیلیوں کے بجائے خوبصورتی اور سہولت پر زیادہ توجہ دی گئی ہے۔
روایتی کک اسٹارٹ ماڈل کو نئے اسٹیکر ڈیزائن کے ساتھ برقرار رکھا گیا ہے، جبکہ آسانی سے اسٹارٹ کرنے کے لیے سیلف اسٹارٹ والا نیا ماڈل بھی پیش کیا گیا ہے۔
اس کے علاوہ کمپنی نے ایک پریمیم ماڈل بھی متعارف کرایا ہے جس میں سرخ اور سیاہ رنگوں کی دلکش فنشنگ کے ساتھ خصوصی بیرونی ڈیزائن شامل کیا گیا ہے تاکہ صارفین کو ایک منفرد لک مل سکے۔
اسپیسیفیکیشنز اور قیمت کے حوالے سے بتایا گیا ہے کہ ان تمام ماڈلز میں 124 سی سی فور اسٹروک انجن شامل ہے جبکہ ایندھن کا ٹینک 9.2 لیٹر کی گنجائش کا حامل ہے۔
قیمتوں کے معاملے میں اسٹینڈرڈ ہونڈا سی جی 125 کی ابتدائی قیمت دو لاکھ 38 ہزار 500 روپے رکھی گئی ہے، جبکہ دیگر اعلیٰ ماڈلز کی قیمتیں ان کی خصوصیات کے مطابق اس سے زیادہ رکھی گئی ہیں۔
