لاہور(اے ون نیوز)ستھرا پنجاب اتھارٹی نے شہر لاہور میں صفائی کے قوانین پر عملدرآمد یقینی بنانے کے لیے ای چالان سسٹم متعارف کرا دیا ہے، جس کے ابتدائی مرحلے میں 200 کمرشل مارکیٹس اور اہم شاہراہوں کو شامل کیا گیا ہے۔ بعض خلاف ورزیوں پر جرمانہ 5 لاکھ روپے تک عائد کیا جا سکے گا۔
اتھارٹی کے مطابق ستمبر کا مہینہ آگاہی اور رعایتی مدت کے طور پر رکھا گیا ہے، جس کے دوران خلاف ورزی کرنے والوں کو جرمانے کے بجائے وارننگ اور آگاہی پیغامات دیے جائیں گے، جبکہ باقاعدہ جرمانوں کا نفاذ 1 اکتوبر سے شروع ہوگا۔ابتدائی طور پر ای چالان سسٹم کے دائرہ کار میں لاہور کی اہم شاہراہیں اور کمرشل علاقے شامل ہیں، جن میں دی مال، جیل روڈ اور فیروزپور روڈ قابل ذکر ہیں۔
رہائشی علاقوں کو فی الحال ای چالان سسٹم میں شامل نہیں کیا گیا، کیونکہ اتھارٹی پہلے مرحلے میں شہریوں کو صفائی اور کچرے کی مناسب تلفی کے حوالے سے آگاہی دینا چاہتی ہے۔
سُتھرا پنجاب اتھارٹی کے چیف ایگزیکٹو آفیسر شیریار عارف خان کے مطابق پائلٹ پراجیکٹ منگل کے روز شروع کیا گیا، جس کے تحت 25 ٹیموں نے مقررہ علاقوں میں کچرا پھینکنے والے افراد کو وارننگز جاری کیں۔ مجموعی طور پر انفورسمنٹ اسٹاف 75 افراد پر مشتمل ہے، جن میں 50 اہلکار 2 فیلڈ اور سپروائزری ٹیموں میں تقسیم کیے گئے ہیں۔
ای چالان سسٹم کا باضابطہ افتتاح لبرٹی چوک میں منعقدہ تقریب کے دوران کیا گیا۔ اس موقع پر اینٹی لٹرنگ اسکواڈز کو مختلف شاہراہوں، مارکیٹوں اور کمرشل مراکز میں تعینات کیا گیا ہے، جو صفائی کی خلاف ورزیوں کی نگرانی کے ساتھ ساتھ شہریوں کو کچرے کو محفوظ طریقے سے ٹھکانے لگانے اور منتقل کرنے کے طریقوں سے آگاہ کریں گے۔
حکام کے مطابق پنجاب لوکل گورنمنٹ ایکٹ 2025 اور سُتھرا پنجاب اتھارٹی ایکٹ 2026 کے تحت عوامی مقامات پر کچرا پھینکنے پر 1,000 سے 10,000 روپے تک جرمانہ عائد کیا جا سکتا ہے۔گھر، دکان یا فیکٹری کے باہر صفائی برقرار نہ رکھنے پر 1,000 سے 50,000 روپے تک جرمانہ ہوگا۔
ممنوعہ پلاسٹک بیگز استعمال کرنے والی دکانوں پر 1,000 روپے جبکہ شاپنگ مالز پر 2,000 روپے جرمانہ عائد کیا جا سکتا ہے۔کچرا جلانے پر 100,000 سے 500,000 روپے تک جرمانہ اور 2 سال تک قید کی سزا ہو سکتی ہے۔ صنعتی یونٹ یا کسی فرد کی جانب سے ٹائر جلانے پر 500,000 روپے تک جرمانہ اور 7 سال تک قید کی سزا مقرر ہے۔
حکام کا کہنا ہے کہ ستمبر کی رعایتی مدت ختم ہونے کے بعد صفائی قوانین کی بار بار خلاف ورزی کرنے والوں کے خلاف باقاعدہ قانونی کارروائی عمل میں لائی جائے گی۔
