لندن(اے ون نیوز)لندن کے میئر صادق خان نے برطانوی پارلیمنٹ کے ایوانِ بالا یعنی ہاؤس آف لارڈز کی رکنیت حاصل کر کے ایک نیا تاریخ ساز سنگِ میل عبور کر لیا ہے۔
صادق خان کو باضابطہ طور پر لارڈ خان آف ٹوٹنگ کا خطاب تفویض کیا گیا ہے، جس کے بعد انہوں نے ہاؤس آف لارڈز میں اپنے عہدے کا حلف بھی اٹھا لیا ہے۔
سابق برطانوی وزیراعظم سر کیئر اسٹارمر نے ان کی طویل سیاسی و عوامی خدمات کے اعتراف میں انہیں لارڈ کے عہدے کے لیے نامزد کیا تھا، جس کی حتمی منظوری برطانوی بادشاہ چارلس سوم نے دی، جس کے تحت صادق خان کو تاحیات لارڈ بنایا گیا ہے۔
حکومت کی جانب سے جاری کردہ سرکاری تعارف میں صادق خان کے طویل اور متنوع تجربے کو خاص طور پر نمایاں کیا گیا ہے۔
سرکاری تعارف کے مطابق صادق خان کا بطور میئر آف لندن، سابق رکنِ پارلیمنٹ، سابق برطانوی وزیر اور انسانی حقوق کے وکیل کے طور پر ایک طویل اور شاندار کیریئر رہا ہے۔
وہ 2016 سے لندن کے میئر کے فرائض انجام دے رہے ہیں اور 2024 میں تاریخی طور پر مسلسل تیسری بار اس عہدے پر منتخب ہوئے تھے۔
صادق خان لندن کی تاریخ کے پہلے منتخب میئر بنے ہیں جنہیں ہاؤس آف لارڈز کا رکن بننے کا اعزاز حاصل ہوا ہے۔ اس سے قبل برطانیہ کی تاریخ میں کسی بھی موجودہ میئر کو ایوانِ بالا میں یہ مقام حاصل نہیں ہو سکا۔
ان کی اس نئی ذمہ داری کے بعد برطانوی سیاسی حلقوں میں ان کی عوامی اور سیاسی خدمات کو بے حد سراہا جا رہا ہے اور اسے برطانوی پارلیمانی نظام میں ایک اہم پیش رفت قرار دیا جا رہا ہے۔
