واشنگٹن(اے ون نیوز)امریکا کے ماہر خارجہ امور و جنوبی ایشیا مائیکل کُوگل مین نےکہا ہے کہ امریکا کی جانب سے 75 ملکوں کے امیگرنٹ ویزوں پر کارروائی روکنےکا فیصلہ ایک چارٹ پر مبنی ہے جس کے اعداد و شمار کا کچھ نہیں پتا کہ وہ کہاں سے لیےگئے ہیں۔
سوشل میڈیا پر ایک پوسٹ میں مائیکل کُوگل مین کا کہنا تھا کہ مذکورہ چارٹ ٹرمپ نے سوشل میڈیا پر پوسٹ کیا تھا، اس چارٹ میں تارکین وطن کی ان برادریوں کی فہرست ہے جو امریکا کی سرکاری امداد کا سب سے بڑا حصہ وصول کر رہے ہیں۔
مائیکل کُوگل مین کے مطابق جن 75 ملکوں پر پابندی لگائی گئی ہے ان میں سے زیادہ تر کے نام اس چارٹ پر بھی موجود ہیں مگر اس چارٹ کے اعداد و شمار کہاں سے لیےگئے ہیں؟ اس کا کچھ پتا نہیں، اس میں موجود کچھ اعداد و شمار تو بہت عجیب و غریب ہیں۔
مائیکل کُوگل مین کے مطابق اس چارٹ کے مطابق تارک وطن پاکستانیوں میں سے 40 فیصد کو امریکا سرکاری امداد دیتا ہے لیکن امریکا میں موجود پاکستانیوں کا ڈیٹا یہ بتاتا ہےکہ یہ بہت زیادہ خوش حال برادری ہے۔
مائیکل کوگل مین نے لکھا کہ امریکا میں پاکستان کے سفیر رضوان سعید شیخ نے نیویارک میں ایک تقریب کے دوران کہا تھا کہ امریکیوں کی اوسط آمدنی 64 ہزار ڈالر ہے جب کہ امریکا میں موجود پاکستانی اوسطاً 76 ہزار ڈالر کماتے ہیں۔
