اسلام آباد (اے ون نیوز)پاکستان اور ایران کے درمیان فری ٹریڈ ایگریمنٹ، سائنس و ٹیکنالوجی، سیاحت، ثقافت، عدالتی اصلاحات اور دیگر شعبوں میں 13 معاہدوں اور مفاہمتی یادداشتوں پر دستخط کیے گئے۔
ایرانی صدر ڈاکٹر مسعود پزشکیان کی وزیراعظم ہاؤس آمد پر شاندار استقبالیہ تقریب منعقد ہوئی، جس میں وزیراعظم شہباز شریف نے مہمان صدر کا پرتپاک استقبال کیا۔ مسلح افواج کے چاق و چوبند دستے نے گارڈ آف آنر پیش کیا۔
سائنس، آئی ٹی، ثقافت، عدلیہ اور تجارت میں تعاون کا آغاز
دونوں ممالک کے درمیان سائنس و ٹیکنالوجی، انفارمیشن ٹیکنالوجی، ثقافت و سیاحت، موسمیاتی تبدیلی، میری ٹائم سیفٹی، فائر فائٹنگ اور عدالتی اصلاحات سمیت متعدد شعبوں میں تعاون بڑھانے کے لیے ایم او یوز پر دستخط ہوئے۔ 2013 کے فضائی سلامتی معاہدے کے تحت ایک ذیلی ایم او یو پر بھی تبادلہ کیا گیا۔ سیاحتی و ثقافتی تبادلوں کے فروغ اور فری ٹریڈ ایگریمنٹ پر عملدرآمد سے متعلق بھی معاہدے شامل ہیں۔
ایرانی صدر کی کابینہ کا تعارف، یادگاری پودا، دعا
تقریب میں نائب وزیراعظم اسحاق ڈار، وزیر دفاع خواجہ آصف، وزیر تجارت جام کمال، وزیر اطلاعات عطا تارڑ، وزیر ریلوے حنیف عباسی و دیگر وفاقی وزراء شریک ہوئے۔ ایرانی صدر نے اپنی کابینہ کا تعارف وزیراعظم سے کرایا۔ بعدازاں وزیراعظم ہاؤس کے سبزہ زار میں ڈاکٹر مسعود پزشکیان نے یادگاری پودا لگایا اور عالم اسلام کی ترقی کے لیے دعا بھی کی۔
