لندن (اے ون نیوز) برطانوی شاہی خاندان کی سابق رکن شہزادی ڈیانا سے متعلق نئی یادداشت میں ایک دلچسپ انکشاف سامنے آیا ہے کہ انہوں نے ایک موقع پر امریکی خاتونِ اول بننے کے امکان کے بارے میں بھی سوچا تھا۔
ڈیانا کے بھائی چارلس اسپینسر نے اپنی یادداشت میں دعویٰ کیا ہے کہ شہزادی ڈیانا کو ایک امریکی سیاست دان نے شادی کی پیشکش کے حوالے سے متاثر کرنے کی کوشش کی تھی اور وہ خود بھی یہ جاننا چاہتی تھیں کہ اگر وہ کسی امریکی صدر کی اہلیہ بنیں تو کیا وہ ایک اچھی خاتونِ اول ثابت ہوسکتی ہیں۔
چارلس اسپینسر کے مطابق شہزادی ڈیانا نے طلاق کے بعد دل کے معروف سرجن ڈاکٹر حسنت خان سے محبت کے دوران جنوبی افریقہ منتقل ہونے کا خواب بھی دیکھا تھا۔ اس وقت اسپینسر جنوبی افریقہ میں مقیم تھے اور ڈیانا کا خیال تھا کہ ڈاکٹر حسنت خان کو کیپ ٹاؤن کے کسی اسپتال میں کام مل سکتا ہے، جس کے بعد دونوں بھائی کے قریب خوشگوار زندگی گزار سکتے تھے۔
اسپینسر کے مطابق برطانیہ میں حالات ڈیانا کے لیے اس حد تک ناقابلِ برداشت محسوس ہونے لگے تھے کہ وہ ملک سے دور نئی زندگی شروع کرنے کے امکانات پر غور کر رہی تھیں۔
تاہم شہزادی ڈیانا کے لیے امریکا کا تصور بھی خاصی دلچسپی کا باعث تھا۔ چارلس اسپینسر کا کہنا ہے کہ ڈیانا نے ایک مرتبہ ان سے پوچھا کہ کیا وہ ایک اچھی امریکی خاتونِ اول بن سکتی ہیں۔
ان کے مطابق ڈیانا کے کئی بااثر اور عمر رسیدہ امریکی مداحوں میں سے ایک نے انہیں یہ یقین دلایا تھا کہ اگر وہ اس سے شادی کرلیں تو وہ امریکی صدارت کا انتخاب جیت سکتا ہے۔
اسپینسر نے لکھا کہ ڈیانا کو ممکنہ طور پر شادی سے زیادہ وائٹ ہاؤس میں رہنے کا تصور دلچسپ محسوس ہوا۔ ان کے بقول شہزادی ڈیانا کو اس خیال میں ایک خاص کشش نظر آتی تھی کہ وہ شاہی خاندان سے الگ ایک نئی شناخت اختیار کریں اور ایسی حیثیت حاصل کریں جو برطانوی شاہی خاندان کے بعض افراد کو حیران اور ناخوش کرسکتی تھی۔
یادداشت میں اسپینسر نے یہ بھی لکھا کہ ڈیانا وائٹ ہاؤس میں ایک ایسے شاندار اور گلیمرس دور کا تصور کرتی تھیں جو جیکی کینیڈی کے دور سے بھی زیادہ نمایاں ہوسکتا تھا۔
تاہم، ان دعوؤں میں امریکی سیاست دان کا نام یا اس ممکنہ صدارتی امیدوار کی شناخت واضح نہیں کی گئی۔ یہ تمام تفصیلات چارلس اسپینسر کی یادداشت میں بیان کردہ واقعات اور ان کی اپنی یادوں پر مبنی ہیں۔
شہزادی ڈیانا 1997 میں پیرس میں ایک ٹریفک حادثے میں انتقال کرگئی تھیں۔ ان کی زندگی، شاہی خاندان سے تعلق اور نجی معاملات آج بھی دنیا بھر میں عوامی دلچسپی کا موضوع ہیں۔
