لاہور(اے ون نیوز)معروف صحافی، کالم نگار اور ادیب الطاف حسن قریشی انتقال کر گئے ان کی عمر94سال تھی، ان کے بڑے بھائی اعجاز حسن قریشی نے 1959 میں اردو ڈائجسٹ کا آغاز کیا، اور الطاف حسن قریشی اس کے پہلے مدیر مقرر ہوئے۔
وہ طویل عرصے تک اس جریدے کی ادارت سے وابستہ رہے۔ اس کے علاوہ وہ روزنامہ جنگ سمیت مختلف اردو اخبارات میں کالم بھی لکھتے رہے ہیں۔
الطاف حسن قریشی نے صحافت کا آغاز اُس دور میں کیا جب 1960 اور 1970 کی دہائیوں میں کمیونزم اور اسلامی فکر کے درمیان نظریاتی کشمکش عروج پر تھی۔ وہ اور ان کے بھائی دائیں بازو کے فکری حلقے سے وابستہ رہے اور پاکستان میں اسلامی سیاسی نظام کی حمایت کرنے والی مذہبی قوتوں کا ساتھ دیا۔ ان کی فکر پر ابوالاعلیٰ مودودی کے نظریات کا گہرا اثر تھا۔
اپنے نظریات اور تحریروں کے باعث دونوں بھائی مختلف حکومتوں کے ادوار میں کئی بار قید بھی کیے گئے۔ سقوطِ مشرقی پاکستان، فوجی اقتدار، اور دیگر اہم قومی واقعات پر الطاف حسن قریشی کے سیاسی تجزیوں نے ملک کے مختلف فکری حلقوں کی توجہ حاصل کی۔
