واشنگٹن (اے ون نیوز) گوگل اور یوٹیوب ٹی وی کے خلاف آٹو رینیول سے متعلق مقدمے کے تصفیے کے تحت ہزاروں موجودہ اور سابق صارفین تقریباً 92 ڈالر کی ادائیگی حاصل کرنے کے اہل ہو سکتے ہیں۔
کلاس ایکشن مقدمے کے تصفیے کے لیے مجموعی طور پر 7.5 ملین ڈالر کی رقم مختص کی گئی ہے۔ مقدمے میں الزام عائد کیا گیا تھا کہ یوٹیوب ٹی وی نے سبسکرپشن کی خودکار تجدید سے متعلق شرائط صارفین کے سامنے واضح طور پر پیش نہیں کیں اور بعض صورتوں میں چارجز سے قبل مطلوبہ رضامندی حاصل نہیں کی۔
مقدمہ جون 2020 میں دائر کیا گیا تھا۔ گوگل اور یوٹیوب ٹی وی نے کسی غلط کاری سے انکار کیا، تاہم طویل قانونی کارروائی سے بچنے کے لیے تصفیے پر رضامندی ظاہر کی۔
کون صارفین اہل ہیں؟
کیلیفورنیا کے وہ صارفین جو یکم فروری 2017 سے 29 اکتوبر 2021 کے دوران یوٹیوب ٹی وی کی کم از کم ایک تجدید شدہ سبسکرپشن کی فیس ادا کر چکے ہیں، ممکنہ طور پر معاوضے کے اہل ہیں۔ سبسکرپشن یوٹیوب کی بلنگ کے ذریعے ذاتی یا گھریلو استعمال کے لیے حاصل کی گئی ہونی چاہیے۔
ابتدائی طور پر فی اہل دعویدار تقریباً 92.26 ڈالر کی رقم متوقع ہے، تاہم حتمی ادائیگی موصول ہونے والے درست دعووں کی مجموعی تعداد کے مطابق کم یا زیادہ ہو سکتی ہے۔
صارفین کو رقم حاصل کرنے کے لیے مختلف طریقے فراہم کیے گئے ہیں، جن میں بینک اکاؤنٹ کے ذریعے ACH ٹرانسفر، پے پال، وینمو، زیلی، ورچوئل پری پیڈ کارڈ اور ڈاک کے ذریعے چیک شامل ہیں۔
کلیم جمع کرانے کی آخری تاریخ
اہل صارفین کو اپنا دعویٰ 30 اگست 2026 تک جمع کرانا ہوگا۔ دعویٰ جمع کرانے کے لیے تصفیے کی ویب سائٹ پر دی گئی ہدایات پر عمل کرنا ہوگا، جبکہ سیٹلمنٹ نوٹس موصول کرنے والے افراد اپنا لاگ اِن آئی ڈی اور PIN استعمال کر سکتے ہیں۔
جن افراد کو نوٹس موصول نہیں ہوا، وہ بھی ویب سائٹ سے کلیم فارم حاصل کرکے اسے مکمل کرنے کے بعد سیٹلمنٹ ایڈمنسٹریٹر کو ڈاک کے ذریعے بھیج سکتے ہیں۔
مقدمے کے حتمی منظوری کے مرحلے کی سماعت 15 اکتوبر 2026 کو مقرر کی گئی ہے۔ تصفیے کی منظوری کے بعد اہل دعویداروں کو ادائیگی کے عمل سے متعلق مزید معلومات فراہم کی جائیں گی۔
