اسلام آباد (اے ون نیوز) وزیراعظم شہباز شریف نے ملک کے تمام بین الاقوامی ہوائی اڈوں پر غیر ملکی سیاحوں اور مسافروں کے لیے علیحدہ امیگریشن کاؤنٹرز قائم کرنے کی ہدایت جاری کر دی ہے۔ یہ اقدام غیر ملکی سرمایہ کاری، سیاحت اور کاروباری سرگرمیوں کو فروغ دینے کی حکومتی پالیسی کا حصہ ہے۔
سرکاری خبر رساں ادارے ’اے پی پی‘ کے مطابق وزیراعظم آفس کی جانب سے جاری بیان میں کہا گیا ہے کہ اس فیصلے کا مقصد ایئرپورٹس پر امیگریشن کے عمل کو تیز اور مؤثر بنانا ہے۔
وزیراعظم آفس کا کہنا ہے کہ علیحدہ کاؤنٹرز کے قیام سے نہ صرف غیر ملکیوں کو بہتر سہولیات ملیں گی بلکہ واپس آنے والے پاکستانی شہریوں کو بھی کم وقت میں امیگریشن کلیئرنس مل سکے گی۔
بیان میں واضح کیا گیا کہ یہ فیصلہ پاکستان کو عالمی سیاحوں، کاروباری وفود اور سرمایہ کاروں کے لیے زیادہ پرکشش اور دوستانہ ملک بنانے کی وسیع حکمت عملی کا اہم جزو ہے۔ امیگریشن کاؤنٹرز کی علیحدگی سے ایئرپورٹ پر ہجوم میں کمی اور سہولت میں اضافہ متوقع ہے۔
