نیشنل سائبر کرائم انویسٹی گیشن ایجنسی (این سی سی آئی اے) نے بیوروکریسی اور اعلیٰ اداروں کی شخصیات کاحساس ڈیٹا بیرون ملک فروخت کرنے والاگروہ پکڑ لیا۔
جمعرات کو سینیٹر پلوشہ خان کی زیرِ صدارت سینیٹ قائمہ کمیٹی برائے آئی ٹی و ٹیلی کام کا اجلاس ہوا۔
اجلاس میں این سی سی آئی اے حکام نے بتایا کہ راولپنڈی میں ایک گینگ پکڑا گیا جو رقم کے عوض بیوروکریسی اور اعلیٰ اداروں کی شخصیات کا حساس ڈیٹا بیرون ملک فروخت کررہا تھا۔
کمیٹی نے سرکاری افسران کے لیے مقامی میسجنگ سپر ایپ بنانے کی سفارش کرتے ہوئے ملک بھر میں انٹرنیٹ سروسز پر ایک ماہ میں بریفنگ طلب کرلی۔
کال سینٹر فراڈ پر بریفنگ دیتے ہوئے حکام نے بتایا کہ فراڈ کے ذریعے رقم کرپٹو کے ذریعے بیرون ملک منتقل کی جارہی ہے، جبکہ غیرقانونی کال سینٹرز میں چینی، ویتنامی، میانماری اور دیگر ممالک کے شہری ملوث ہیں۔
حکام کے مطابق کچھ کال سینٹرز سے ریکوری کرکے متاثرین کو رقم واپس بھی کی گئی ہے ۔
اس کے علاوہ سینیٹر افنان اللہ نے کہا کہ ٹک ٹاک لائیو پر انتہائی نامناسب اور خطرناک حرکات کے ساتھ توہین اسلام سے متعلق مواد بھی بنایا جارہا ہے، جبکہ سینیٹر کامران مرتضیٰ نے کہا کہ جان بوجھ کر معاشرے میں ایسی چیزیں پھیلائی جارہی ہیں۔
چیئرمین پی ٹی اے کے مطابق پاکستان میں روزانہ سوشل میڈیا سے متعلق 500 شکایات موصول ہورہی ہیں، کمیٹی ارکان نے 16 سال سے کم عمر بچوں کے لیے انٹرنیٹ کے استعمال پر سختی کی تجویز دی۔
