ڈھاکہ(اے ون نیوز)بنگلا دیش کے معروف اداکار شانتو خان اور ان کے والد سلیم خان کو وزیر اعظم شیخ حسینہ کے مستعفی ہونے کے بعد ملک میں ہونےوالی بدامنی کے درمیان مشتعل ہجوم نے قتل کر دیا۔
بھارتی میڈیا کے مطابق ان مظاہروں کے درمیان ہی پیر کی رات کو چاند پور میں معروف بنگالی اداکار شانتو خان اور ان کے والد سلیم خان کو مشتعل ہجوم نے قتل کردیا،رپورٹس میں دعویٰ کیا گیا ہے کہ اداکار شانتو خان کے والد بنگلا دیشی پروڈکشن ہاو¿س کے مالک اور شیخ حسینہ کے حمایتی رہ چکے تھے ، جنہیں بعد میں عوامی لیگ سے نکال دیا گیا تھا۔
مقامی میڈیا کی رپورٹس میں کہا گیا ہے کہ شانتو اور ان کے والد ملک میں جاری مظاہروں کے درمیان ملک سے فرار ہونے کی کوشش کر رہے تھے اس دوران ان کا مشتعل ہجوم سے سامنا ہوا،ڈھاکا ٹریبیون کی ایک رپورٹ میں کہا گیا ہے کہ ہجوم سے سامنا ہونے کے بعد سلیم اور شانتو نے اپنے دفاع میں پستول سے گولیاں بھی چلائیں لیکن مظاہرین نے ان پر جوابی حملے کرتے ہوئے انہیں قتل کر دیا۔
رپورٹس کے مطابق شانتو نے 2019 میں فلم انڈسٹری میں قدم رکھا اور کئی مشہور بنگالی فلموں میں اداکاری کے جوہر دکھائے جبکہ ان کے والد نے بھی کئی ہٹ فلمیں بنائیں،دوسری جانب اداکار اور ان کے والد کے قتل کی خبر سامنے آنے کے بعد بنگالی فلم انڈسٹری کی جانب سے افسوس کا اظہار کیا جارہا ہے۔
