دہلی(اے ون نیوز)بھارت کے اوپنر بیٹر ابھیشیک شرما نے افغانستان کے خلاف تیسرے ٹی20 میچ میں صرف 30 گیندوں پر سنچری بنا کر روہت شرما کا ریکارڈ توڑ دیا۔
دہلی میں کھیلے گئے میچ میں بھارت نے پہلے بیٹنگ کرتے ہوئے مقررہ 20 اوورز میں 7 وکٹوں پر 221 رنز بنائے جبکہ 222 رنز کے ہدف کے تعاقب میں افغانستان کی پوری ٹیم 14.1 اوورز میں 94 رنز پر آؤٹ ہوگئی۔
ابھیشیک شرما نے 30 گیندوں پر 108 رنز کی شاندار اننگز کھیلی جس میں 9 چوکے اور 11 چھکے شامل تھے۔ انہوں نے صرف 16 گیندوں پر نصف سنچری مکمل کی اور اگلی 14 گیندوں پر سنچری بنا ڈالی۔
اس سنچری کے ساتھ ابھیشیک نے روہت شرما کا ریکارڈ توڑ دیا جنہوں نے 2017 میں سری لنکا کے خلاف 35 گیندوں پر سنچری اسکور کی تھی۔
ابھیشیک شرما آئی سی سی کے فل ممبر ممالک کے درمیان ٹی20 انٹرنیشنل میں تیز ترین سنچری بنانے والے بیٹر بھی بن گئے ہیں۔ تاہم ٹی20 کرکٹ میں مجموعی طور پر تیز ترین سنچری کا ریکارڈ اب بھی ساحل چوہان کے پاس ہے جنہوں نے 2024 میں ایسٹونیا کی جانب سے قبرص کے خلاف صرف 24 گیندوں پر سنچری بنائی تھی۔
یہ ابھیشیک شرما کی ٹی20 انٹرنیشنل میں تیسری سنچری ہے۔ روہت شرما 5 جبکہ سوریا کمار یادیو 4 سنچریاں بنا چکے ہیں۔
ابھیشیک شرما آئی سی سی ٹی20 رینکنگ میں دوسرے نمبر پر موجود ہیں جبکہ ایشان کشن پہلے نمبر پر ہیں۔
