چیئرمین پیپلز پارٹی بلاول بھٹو زرداری نے نوازشریف کو طنز کا نشانہ بناتے ہوئے کہا ہے کہ 3 بار وزیراعظم بنا تو انہی کے ساتھ لڑ پڑا جنہوں نے وزیراعظم بنوایا تھا۔
بلاول بھٹو کا لیاقت پور میں جلسے کے دوران کہنا تھا کہ بہت مشکل سے شیر کل نظر آیا، ایسا نہ ہو جیالوں کا جوش و جذبہ دیکھ کر دوبارہ گھر میں چھپ جائے۔ ہم ڈرنے والے، گھبرانے یا پیچھے ہٹنے والے نہیں ہیں۔ لاہور کے سیاست دانوں کا ڈٹ کر مقابلہ کریں گے۔ حکومت میں آ کر 30 لاکھ گھر بنائیں گے اور غریبوں کو 300 یونٹ بجلی مفت فراہم کریں گے۔
انہوں نے جیالوں سے کہا کہ پیپلز پارٹی کا 10 نکاتی ایجنڈا گھر گھر پہنچائیں، میں نے 20 لاکھ گھر سندھ میں بنانے کا منصوبہ شروع کر دیا ہے۔ ایک طرف غریبوں کی جماعت ہے، دوسری طرف وہ شیر ہے جو غریبوں کا خون چوستا ہے۔ 3 بار وزیراعظم بن کر غریبوں کا خون چوسا مگر پیٹ نہیں بھرا، انہی کے ساتھ لڑ پڑا جنہوں نے وزیراعظم بنوایا تھا۔
